(魔術監製 阿三, Alfred AuStartup 媒體報道) 蘋果日報訪問 | Hong Kong Startup Platform - 最強的青年創業家O2O平台

魔術監製 阿三, Alfred Au 青年創業家傳媒報導: 蘋果日報訪問

分享 : Facebook Twitter Google LinkedIn

Hong Kong Startup 魔術監製 阿三, Alfred Au 青年創業家傳媒報導: 蘋果日報訪問

 

訪問連結: http://hk.apple.nextmedia.com/news/art/20150621/19192270

 

 

 

 

 

【本報訊】要介紹歐錦豪(阿三)的職業,連他自己都頴晒頭。萬聖節鬼屋、澳門賭場娛樂騷,他都是大旗手。娛樂騷專家?「不如叫我阿三,以前出騷好多個阿豪,我話個個玩魔術要變葵扇A,不如我學《賭神》,變隻階磚3」。中大工程系畢業不做工程師,寧做魔術師,「都係師啫,入鬼屋,行到邊個位先折射到隻鬼,一樣要識光學原理」。誰說不是學以致用?阿三蠱惑反問。


記者:呂麗嬋 攝影:何柏佳

 

三歲定八十,阿三這個人,就是刁鑽。「小學時,喺電視睇人變魔術,覺得好勁,暑假去圖書館搵啲魔術書睇,我真係數過,91本,我全部睇晒。到預科,有次返大陸,喺街見人玩啤牌魔術,知道魔術係有得學嘅法術,先下決心搵人學」。

只是,愛還愛,作為土生土長的香港仔,當然從無想過要以魔術師為業。2001年中文大學自動化及計算機輔助工程學系畢業,留在大學裏做研究,其後在一間電路板公司做見習工程師。

 

要懂物理 學以致用

 

「喺大學,研發機械人同做人工智能項目,到出嚟做嘢,係另一回事」。做大企業裏的螺絲釘,眼前是盤踞在上的老鬼,心有不甘。「轉過幾間公司,試過升職,但做咗箭靶,好唔開心,成日唔想返工,試過朝早起身,兩隻手完全唔郁得」。


情緒失控、身體出現毛病,「屋企唔等我開飯,但都要搞得掂自己,做咗幾年嘢,有少少積蓄,計過條數,決定辭職」。悠長假期,參加歷奇活動,鍛煉心智,卻遇上伯樂。


「識咗個社工,佢知我有玩開魔術,撞正暑假,介紹我入學校教興趣班,最神奇係大家初相識,佢好信任我,一次過俾晒錢」。兩萬元現金,說多不多,卻是他第二人生的「第一桶金」,不夠他一世無憂,卻叫他知道,眼前還有其他路,「以前無諗過玩魔術可以維生,嗰時開始諗:好多魔術道具,都會應用物理學原理」。好歹學以致用,但這種「有何不可」的想法,你接受不代表你阿媽接受!


「一起步,冇錢租office,屋企就係我公司,有師奶嚟,隨口問你個仔做緊咩,我見我阿媽真係深呼吸一下,話我做工程師,今日放假,我聽到嗰吓,嗰心好唔舒服」。

 

 

慶幸終獲母親接納

 

最悲壯一次,是訂做了斷頭台,撞正農曆新年送貨,家中六國大封相一觸即發。「問得最多嗰句係:你玩夠未呀?」百辭莫辯,惟有加倍努力證明自己,「30歲係個關,我知一返轉頭,喺番嗰個你咁熟悉嘅環境,你就唔會再有勇氣走番出嚟」。


畢業幾年,大部份同學做了工程師,也有留在大學做研究,晉身中產,他卻由零開始,成立一人製作公司,寫計劃書,爭取演出機會。「嗰時為咗令阿媽放心,教大學校外課程都同阿媽吹到話喺大學教書;又試過教歌迷會表演魔術畀劉德華睇!」生活不是童話,為開拓市場擴大人脈,他爛做、不拘一格,別人眼中這是「無得揀」,他卻深信這是選擇的代價,能否走下去,在乎你有多大決心。


「幾年前中標幫澳門漁人碼頭統籌同設計鬼屋,係轉捩點,等於拍電影,你做監製,錢未必好多,但滿足感好大」。距離所謂的成功,仍路漫漫,但37歲的阿三,說從無後悔走出別人眼中的康莊大道。


他說:「到今時今日,最開心嘅係阿媽終於接受我係一個魔術師,我唔期望佢明白我係咩娛樂騷監製,至少,唔再係工程師就已經好好」。自己的人生自己揀,樂做階磚3的歐錦豪如是說。

 

立即聯絡青年創業家 Hong Kong Startup