我的網購創業歲月 | Hong Kong Startup Platform - 最強的青年創業家O2O平台

我的網購創業歲月

Hong Kong Startup焦點/新聞/消息/情報: 我的網購創業歲月
日期: 2016-02-24 瀏覽: 1200 作者: Michael Leung 公司/機構: eBay (賣家)

我的網購創業歲月

Michael Leung同一般屋村長大既人一樣,都係聽長輩話學門手藝一技傍身,所以讀左個全日制機械工程文憑就開始半工讀。平日打工做手錶有關產品開發,幫好多美國同歐洲品牌做代工。夜晚去理工大學上製造工程同管理有關課程。
 
07年有朋友叫搞節目禮品生意,當時已經想到搞網購,但當時乜都唔識,所以讀左個差不多最貴既網上創業課程(學費係我當時成個月人工),以為好似導師話做個網站就大把生意。上完堂立刻全力做左人生第一個賣玩具既網站,咁事實係網站無人睇,連$1蚊生意都做唔到。經驗總結做網上生意係要先有人流才有生意(不論最後賺與蝕)。所以09年又去讀多個教人去eBay賣貨既課程,上完頭一堂就開個eBay Account放導師比既貨上eBay賣,又竟然第一星期有三單生意,當時真係開心到唔識講。之後日頭打工,夜晚做eBay生意。同時識左兩個Partner一齊研究點樣可以係eBay做多D生意,我地會互相比較生意額之外又會做好多research,學到D新方法,可以做少D之餘又搵多D生意,個時5個月都有成20幾萬生意。
 
2010年就將我地3個人既經驗集合埋去教人點樣做網上生意,就係咁出左個課程叫"eBay加薪班"。開始時都算唔錯,每月都開一班,學生大部份都係中年在職女仕,佢地希望有工餘/空閒時間可以為自己加薪。有個剛上完第一堂既學生頭一個月跟住我個課程方法已經賣左十件貨。
 
當eBay生意發展落去見到有太多大陸人用價格戰令利潤大減,已經留意到唔可以依賴單一個平台,所以由2012年開始就係唔同購物網站開網店,例如ioffer。同時亦用網上免費平台做自己的產品網站,常用有weebly。呢個係我最辛苦既時間,除左日常包貨寄貨,回覆外國買家電郵外,又要做網店同網站,當時每日只有2-3小時休息。
 
另外亦有不斷跟進Amazon在網購上的發展,當時Amazon只給美國人開Account賣野,但營業額已經係eBay既四倍,睇到我流晒口水。2014年我一知道Amazon開放比香港人開戶口時,我立刻去開網店,同時亦讀左個Amazon銷售課程,希望用最短時間了解Amazon 系統運作同點樣可以用最短時間做大盤生意。當時做了第三個月已經可以做到日出幾十單生意,每月收近萬美金。
 
以為自己都好得,但上年去參加一個深圳跨境電商大會,見到由產品開發,物流,在線倉存管理系統一條龍配套,明白到香港已經比大陸落後幾年,而且上台做分享講者全部都係90後。所以做網購一定要不斷提升自己,不停update市場資訊,不論係產品潮流、物流配套、購物平台更新、等等。
 
其實由2013年中開始,我都會在銅鑼灣一間co-worker space做每月網購分享,叫"網購星期二",其中遇見到一對年青人放棄正職全身投入網上韓國時裝生意,我們一班朋友都從旁給予意見,同時在年青人身上學會在社交平台推廣方法。
 
但2015年尾真係大忙,由2015年10月起就停左。不過由今年三月開始會重新再開始,希望可以用自己既經驗幫到想做網購既朋友,同時又可以互相update下大家既資訊。
回到 Startup故事

關於我們

「香港青年創業家平台」是香港唯一的網上青年創業家互動平台,由著名香港創業組織「青年創業軍」及組織創辦人(溫學文先生 Phoenix)所發起及組成團隊管理,成功讓香港青年創業界正式進入O2O (Online to Offline)大時代! 這裡成功雲集了香港各青年創業家的資訊及資歷,例如青年創業家的個人資歷、所創立的優質創業項目、媒體報導的創業故事等等也一應俱全。 誠邀優質青年創業家的你,都立即在這裡登記資料,讓全香港人都知道你的青年創業資歷!

Copyright © 2019 青年創業軍 Youth Entrepreneur Warrior. All Rights reserved.

創業青年互動平台
×